د لویې څارنوالۍ او د اوبو او برېښنا وزارت تر منځ د همکارۍ هوکړه لیک لاسلیک شو
دا هوکړه لیک د لویې څارنوالۍ او د اوبو او برېښنا وزارت تر منځ د (روښنایۍ پروګرام) تر نامه لاندې د ۱۳۹۷ کال د سلواغې پر اتمه د لویې څارنوالۍ د مالي او اداري چارو مرستیالۍ د غونډو په تالار کې لاسلیک شو.
په دغه پروګرام کې د لویې څارنوالۍ مالي او اداري مرستیال وحیدالدین ارغون، د اوبو او برېښنا وزارت د برېښنا د پالسیو د طرحې رئیسې ملالۍ بارکزۍ، د لویې څارنوالۍ د مالي او اداري چارو عمومي رئیس سید فرید حسنیار، د خدماتو رئیس محمد آصف فیاض او د دغې ادارې ځینو نورو کارکوونکو ګډون کړی و.
دغه هوکړه لیک په لویه څارنوالۍ کې د معمولي ګروپونو پر ځای د کم لګښته ګروپونو د کارېدنې په موخه لاسلیک شوی دی. په دغه پروګرام کې د لویې څارنوالۍ د مالي او اداري چارو مرستیال وویل، چې دغه هوکړه لیک په دولتي ادارو کې د برېښنا د لګښت کمولو په موخه لاسلیکیږي.
د ښاغلي ارغون په خبره، د برېښنا کم لګښت د دولت اقتصاد پیاوړی کوي. نوموړي د خپلو خبرو په دوام سره وویل: «لویې څارنوالۍ دوه کاله وړاندې د زیات لګښته ګروپونو پر ځای د کم لګښته ګروپونو د کارولو کار پیل کړ، چې دغه چاره به له هېوادوالو سره برېښنا ته د لاسرسي په برخه کې مرسته وکړي.»
د نوموړي په خبره، لویه څارنوالي به د یاد شوي پروګرام له تطبیق مخکې او وروسته خپل د برېښنا د لګښت د شپږ دوریي بل کاپي په محرمه بکسه کې د اوبو او برېښنا وزارت ته واستوي. نوموړي همداراز ټينګار وکړ، چې لویه څارنوالي د دغه پروژې د پلي کولو په موخه د اوبو او برېښنا وزارت او پلي کوونکي شرکت سره همکاره ده.
له بلې خوا ملالۍ بارکزۍ په دغه پروګرام کې وویل، چې د اوبو او برېښنا وزارت اصلي موخه خلکو ته په ښه توګه د برېښنا رسول دي. د نوموړې په خبره، د برېښنا کم لګښت د برېښنا د ښه مدیریت غوره لاره ده. اغلې بارکزۍ زیاته کړه، د دغې پروژې په پلي کولو سره د برېښنا د زیات لګښت مخنیوی کېږي او همداراز د یادې پروژې په واسطه کولای شو د ادارو او ځینو سیمو برېښنايي ستونزې حل کړو.
د روښنایۍ پروګرام (د معمولي ګروپونو بدلول په کم لګښته ګروپونو) د اوبو او برېښنا وزارت، په بنسټیزو چارو کې د جمهوري ریاست د ارشد مشاوریت او د افغانستان د برېښنا شرکت له خوا ترتیب او د هېواد د اقتصادي عالي شورا له خوا تائید او منظور شوی دی.
دغه پروګرام درې فازه لري، چې لومړی فاز یې په دولتي ادارو او د ښار د سړکونو د معمولي ګروپونو پر ځای د کم لګښته ګروپونو نصبول ګڼل کیږي.
