د لویې څارنوالۍ عالي شورا غونډه وشوه
مرغومي ۲۸، ۱۳۹۹
د لويې څارنوالۍ عالي شورا غونډه د افغانستان اسلامي جمهوري دولت لوی څارنوال څارنپوه محمد فرید حمیدي په مشرۍ د ۱۳۹۹ لمریز کال د مرغومي پر ۲۸ وشوه.
دا غونډه د قرآن کریم په تلاوت او د ملي سرود په خپراوي پیل شوه.
د غونډې په پیل کې د هېواد لوی څارنوال، د قاضیانو پر موټر برید چې نن سهار د کابل د لسمې حوزې اړوند وشو، وغانده او د افغانستان اسلامي جمهوري دولت سترې محکمې له رهبرۍ او کارکوونکو سره يې غمشریکي وښووله. ښاغلي حمیدي د خدای له درباره د دې پېښې شهیدانو ته د جنت او ټپيانو ته د بېړنۍ روغتیا غوښتنه وکړه.
د هېواد لوی څارنوال وویل: «دغې ادارې ته د لویې څارنوالۍ د کارکوونکو امنیت او خوندیتوب اهمیت لري او د خپلو کارکوونکو د خوندیتوب او امنیت لپاره له ټولو امکاناتو استفاده کوي.» ښاغلي حمیدي د دغې ادارې له کارکوونکو څخه وغوښتل، د دې تر څنګ چې امنیتي مسؤولان د امنیت ساتنه کوي، پخپله هم د ځان د خوندیتوب په اړه جدي پام وکړي.
د دې غونډې په لومړۍ برخه کې د محکوم بها د مالي حصول د پروسیجر په اړه چې د لویې څارنوالۍ عالي شورا د ۴۲ غونډې ۱۳۹۹/۱۰/۲۱ له خوا موظفې کمېټې ته سپارل شوی و، د دغې کمېټې پر راپور بحث وشو.
د لویې څارنوالۍ عالي شورا غړو د یادې موضوع په اړه تر بحث وروسته پرېکړه وکړه، چې د محکوم بها د مالي د جزا یا دَین په تړاو د کمېټې او د عالي شورا د غړو نظریات د قوانینو کمېټې ته واستول شي او په دې برخه کې دې شته ستونزې روښانه شي.
همداراز د احکامو پر تنفیذ د نظارت او د تدقیق او مطالعاتو عمومي ریاستونو او د مسلکي زده کړو د انستیتیوت ریاست ته دنده وسپارله، چې د مالي محکومیتونو د تنفیذ طرزالعمل دې ژر چمتو کړي.
د غونډې په بله برخه کې د بشري سرچینو د پراختیا عمومي ریاست د دغې ادارې د ۱۳۹۹ مالي کال د باالمقطع کارکوونکو ارقام وړاندې کړل او په اړه يې د لويې څارنوالۍ غړو بحث وکړ.
د لویې څارنوالۍ عالي شورا غړو تر بحث وروسته په عسکري چارو کې د لويې څارنوالۍ مرسیتال په مشرۍ د بشري سرچینو د پراختیا عمومي رئيس، مالي او اداري عمومي رئیس، د امنیتي کمېسیون رئيس، د جنډر رئيس او د کنټرول او مراقبت عمومي ریاست استازي ته دنده وسپارله، چې د اړوند قانون او مقررې له مخې اجراات وکړي.
دا غونډه په هېواد کې د سرتاسري سولې د تأمین او د افغانانو د سوکالۍ په هیله پای ته ورسېده.
