د لویې څارنوالۍ عالي شورا ناسته وشوه
د لویې څارنوالۍ عالي شورا ناسته، د افغانستان اسلامي جمهوري دولت لوی څارنوال څارنپوه محمد فرید حمیدي په مشرۍ د ۱۳۹۸ کال د چنګاښ پر ۳۰ وشوه.
د عالي شورا په پیل کې، د ۱۳۹۷/۱۲/۲۱ نیټې د ۱۴۷۳ شمېرې وړاندیز چې د محبسونو عمومي ریاست د کشف او اوتراتیفي مدیریت له خوا، د یو لړ هغه څیزونو په اړه چې د محبوسینو په هستوګنځيو او خونو کې د پلټلو پر مهال لاس ته راغلي، بحث وشو.
عالي شوار پرېکړه وکړه، چې د کورنیو چارو وزارت د محبسونو او حقوقو ریاست، د یاد وزارت له ازادۍ محرومو ځایونو او د احکامو د تنفیذ او حبس د بدیل عمومي ریاستونو له پلاوو څخه دې کمېټه جوړه شي یاده موضوع دې و ارزوي او راپور دې په راتلونکې ناسته کې وړاندې کړي.
د ناستې په بله برخه کې، د لویې څارنوالۍ د ۱۰۷ هغو اداري او مسلکي کارکوونکو د ګمارني په اړه خبرې وشوې، چې د ناروغتیا او غیابت له امله منفک شوي و او اوس د بیا ګمارنې غوښتونکي دي.
د لویې څارنوالۍ عالي شورا د بشري سرچینو د پراختیا عمومي ریاست ته دنده وسپارله، چې د نورو وړ کسانو په شان دې دوی ته هم د ازاد رقابت له لارې د مسلکي او اداري بستونو د ازموینو په بهیر کې د شمولیت حق ورکړي.
د ناستې په بله برخه کې، د کندز د استیناف څارنوالۍ د استهدایي په اړه، چې د توظیف شوي څارنوال څخه د شکایت او قضایي قضیې د څېړنې د تبدیلۍ په اړه وه، بحث وشو.
عالي شورا پرېکړه وکړه، چې د عارضینو د شکایتونو د حل په برخه کې اړونده استیناف څارنوالي دې د پخواني څارنوال په تبدیلۍ سره اجراات وکړي یا هم یاده پروسه دې تر بشپړ نظارت لاندې ونیسي. هغه مهال چې د دوسیې د قضایي حوزي تبدیلي د بحث وړ وي، استیناف څارنوالي کولای شي د دوسیې تبدیلي د موجه دلیلونو په راوړلو او د جزایي اجرااتو قانون د ۱۴۷ مادې د صراحت له مخې، لویې څارنوالۍ ته وړاندې کړي.
د ناستې په پای کې، د لویې څارنوالۍ د ۱۰۱ کسانو ملکي مسلکي او نظامي غړو د څارونکو کادري درجې، د عالي شورا د تائید وړ وبلل شوې.
