د لویې څارنوالۍ عالي شورا ناسته وشوه
د لویې څارنوالۍ عالي شورا ناسته، د افغانستان اسلامي جمهوري دولت لوی څارنوال څارنپوه محمد فرید حمیدي په مشرۍ د ۱۳۹۸ کال د لیندۍ پر شلمه وشوه.
د ناستې په پیل کې، لویه څارنوالۍ کې د نظامي زده کړو د کورسونو په اړه، چې د لویې څارنوالۍ د عسکري چارو مرستیالۍ او مسلکي زده کړو ریاست له خوا یې طرحه وړاندې شوې وه، بحث وشو.
د لویې څارنوالۍ عالي شورا؛ عسکري برخه کې د لوی څانوال د مرستیال په مشرۍ د کورني او بهرني امنیت پر وړاندې له جرمونو سره د مبارزې څارنوالۍ، عسکري برخه کې له اداري فساد سره د مبارزې څارنوالۍ، د بشري سرچینو د پراختیا عمومي ریاست او مسلکي زده کړو ریاست د عمومي رئیسانو په ګډون جوړه شوې کمېټه مؤظفه کړه، څو یاده طرحه په هر اړخیزه توګه وارزوي او پایله یې راتلونې ناستې ته وړاندې کړي.
د ناستې په دویمه برخه کې، د ډایکندي اسیناف څارنوالۍ ریاست د عمومي جزا څارنوالۍ ریاست د اجرائیه مامور د کار د دوام او د توقیف شوې مرحلې د معاشاتو په اړه بحث وشو.
عالي شورا په دې تړاو داخلي تفتیش ریاست ته دنده وسپاره، څو په دې اړه د ملي امنیت د عمومي ریاست کړنې په جدي توګه وڅېړي او پایله یې راتلوونکې ناستې ته وړاندې کړي.
د ناستې په درېیمه برخه کې، د بدخشان واخان ولسوالۍ د اوسېدونکي نورعلي د محمد کریم زوی د غلا دوسیې په تړاو د بدخشان استیناف څارنوالۍ پر استهدایه چې د جزایي اجرااتو قانون د ۷۶ مادې څلورمې فقرې له مخې، د محکوم بها د مجازاتو د درېدو په اړه ده، بحث وشو.
عالي شورا پرېکړه وکړه، چې د تدقیق او مطالعاتو څارنوالۍ عمومي ریاست دې په دې برخه کې د قوانینو د مادو د تفسیر په موخه وړاندیز ترتیب کړې او د تحریراتو او دارالانشأ ریاست له لارې دې یې د قانون حاکمیت عالي شورا ته واستوي. همداراز د بدخشان استیناف څارنوالۍ د استهدایي په تړاو دې هم د قانون د احکامو په رڼا کې قانوني مشوره، مستهدې مرجع ته واستوي.
د ناستې په پای کې، د عالي شورا ناستې غړو د ملکي او نظامي برخې د ۹۸ څارنوالانو د کادري درجو لوړوالي منظور کړ.
