د لویې څارنوالۍ ۱۲۷ کارکوونکو ته اداري او مسلکي روزنه ورکړل شوه
دغه کارکوونکي په اوو لنډ مهاله روزنیزو پروګرامونو کې چې د ۱۳۹۸ کال د غویي او غبرګولي میاشتو کې جوړ شوي و، وروزل شول.
دغه پروګرامونه د لویې څارنوالۍ د اداري او مسلکي کارکوونکو د ظرفیت لوړونې، تخصصي او مسلکي زده کړې د زیاتوالي او د اجرااتو د اغیزناکې پایلې په موخه جوړ شوي و.
دغه روزنیزو پروګرامونه د بېلابېلو موضوع ګانو په اړه لکه: کړنې او ارزونې، اداري مراسلات، ښه او مسلکي چلن، مدیریتي دندې، د اداري اجرااتو قانون، پلان جوړونې او راپور لیکنې په اړه و، چې په لړ کې یې د وړکتون د ښوونکو روزنیز پروګرام هم شامل و.
په دغه پروګرامونو کې د مالي او اداري، اداري فساد، خدمتونو او نظامي کدر پرسونل، نړیوالو جرمونو سره د مبارزې څارنوالۍ، کنترول او مراقبت، د ماشومانو له سرغړونو سره د مبارزې، پر ازادۍ محرومو ځایونو د نظارت، د څلورو زونونو د ریاستو کارکوونکو او د وړکتون ښوونکو ته روزنه ورکړل شوې ده.
دا په داسې حال کې ده، چې لویه څارنوالي د خپلو کارکوونکو او مسلکي څارنوالانو د ظرفیت لوړونې په موخه، په مرکز او ولایتونو کې پرلپسې ورته روزنیز پروګرامونه جوړوي.
