د مخابراتو او معلوماتي تکنالوژۍ پخوانی وزیر بري الذمه وبلل شو
د مخابراتو او معلوماتي تکنالوژۍ پخوانی وزیر عبدالرزاق وحیدي او د احمد طباعتي شرکت مرستیال حشمت الله د سید احمد زوی له واک څخه په ناوړه ګټه اخېستنه کې د لاس لرلو په تور، د اداري فساد له لویو جرمونو سره د مبارزې عدلي او قضایي مرکز د استیناف محکمې له خوا، د ۱۳۹۸ کال د چنګاښ پر ۳۰ په علني ډول محاکمه شول.
د ناستې قضایي پلاوي، عبدالرزاق وحیدي چې له واک څخه په ناوړه ګټې اخېستنه کې د لاس لرلو په تور تورن شوی و، د قانون په پلي کولو کې د سهوې او مناسبو دلیلونو د نشتوالي له امله، د جزا کود او جزایي اجرااتو قانون د پنځمو مادو په رعایتونې د اساسي قانون د ۲۵ مادې له مخې، بري الذمه وباله.
هغه وخت چې ښاغلی وحیدي په مالیې وزارت کې د مرستیال په توګه دنده پر مخ وړه، له واک څخه د ناوړه ګټې اخېستنې په تور تورن او د اداري فساد له لویو جرمونو سره د مبارزې عدلي او قضایي مرکز د ابتدایي محکمې له خوا، په غیابي توګه په درې کاله تنفیذي بند محکوم شوی و.
نوموړي همداراز د اداري فساد له لویو جرمونو سره د مبارزې عدلي او قضایي مرکز د ابتدايي محکمې له خوا، د ۱۳۹۸ کال د وري پر ۱۸ په یوه بله قضیه او مالیې وزارت کې د خپل ماموریت پر مهال له واک څخه د ناوړه ګټې اخېستنې په تور په دوولس زره نغدي جریمه هم محکوم شوی و.
همداراز د قضایي ناستې پلاوي، حشمت الله له واک څخه په ناوړه ګټه اخېستنه کې د لاس لرلو له امله، د جزایي اجرااتو قانون د ۲۳۷ او د جزا کود د ۱۷ او ۵۸ مادې په رعایتونې د جزا قانون د ۱۴۵ او ۲۸۵ مادې له مخې، په شپږو میاشتو تنفیذي بند محکوم کړ.
د یادونې وړ ده، چې یادې محکمې، د اداري فساد له لویو جرمونو سره د مبارزې عدلي او قضایي مرکز د ابتدايي محکمې پرېکړه، چې احمدي طباعتي شرکت یې د جزا قانون د ۶ او د جزا کود د ۱۴ مادې له مخې، د ۱۹ میلیونه و ۱۹۷ زره او ۸۹۰ افغانیو په ورکړه محکوم کړی و، تائید کړه.
