د کابل ولایت عسکري څارنوالۍ په هماهنګۍ یوه مدني بنسټ د کابل ښار ځینې پولیسې وستایلې
دغه ښځینه پولیسې د کابل ولایت د عسکرۍ څارنوالۍ په هماهنګۍ د اصلاح غوښتونکو ځوانانو مدني بنسټ د کابل ښار ځینې پولیسې د ۱۳۹۷ کال د زمري پر ۱۴ وستایلې. د دوی د ستاینې غونډه د کابل امنیه قوماندانۍ د غونډو په تالار کې وشوه.
په دغه غونډه کې د کابل عسکري څارنوالۍ رئيس ډګروال محمد نواب احمدزي د نارینه پولیسو تر څنګ د ښځینه پولیسو شتوالی ارزښتناک وګاڼه او زیاته یې کړه، چې په کاري چاپیریال کې د ښځینه او نارینه پولیسو تر منځ مرسته د نظام د تقویت لامل کېږي.
ښاغلي احمدزي وویل: «د پولیسو د دندې ښه ترسراوی د دې سبب کېږي، چې د ولس او حکومت تر منځ واټن کم شي.» نوموړي د ښځينه پولیسو پر هڅو ټینګار وکړ او زیاته یې کړه، چې د دوی له زحمتونو او سرښندنو هېڅوک سترګې نه شي پټولی.
له دې سره سم د کابل ولایت امنیه قوماندان پاسوال داوود امین د تلاشۍ پر مهال د نارینه وو پولیسو تر څنګ د ښځینه وو پولیسو شتوالی حتمي او اړین وباله. نوموړي په دې تړاو وویل، چې د تلاشۍ پر مهال د ښځینه پولیسو شتون پر نظام د خلکو باور زیاتوي.
ښاغلي امین ښځینه پولیسو ته په خطاب کې وویل: «ستاسې د دندې اجرا د هېواد پر دښمنانو ناوړه اغېز کړی او دوی نور نه شي کولای، چې په ښځینه جامو کې ځان خپلو ناوړو اهدافو ته ورسوي.»
نوموړي له خلکو سره د پولیسو پر نېک سلوک هم ټینګار وکړ او د ۱۰۱ آسمايي زون د تعلیم او تربيې له آمریته يې وغوښتل، چې د سلوک د زده کړې په برخه کې دې له پولیسو او حوزو سره همکاري پراخه کړي.
د لویې څارنوالۍ د جنډر ریاست رئیسې د ښځینه پولیسو جرأت وستایه او په دې اړه یې وویل، چې ښځینه پولیسې له کلتوري او ټولنیزو ستونزو سره سره بیا هم د نارینه وو پولیسو تر څنګ دنده ترسره کوي.
نوموړې له امنیتي ادارو وغوښتل، چې د ښځینه پولیسو کاري مصونیت ته جدي پام وکړي.
بل پلو د اصلاح غوښتونکو ځوانانو مدني بنسټ مشر سید جمال سلطاني د ښځینه پولیسو ستاینه وکړه او له دوی يې وغوښتل، چې په پوره مېړانې سره دې خپلو دندو ته دوام ورکړي.
د دغه بنسټ مشر همداراز زیاته کړه، چې موږ تل هڅه کوو، د پولیسو ملاتړ وکړو، چې د افغانستان د سوکالۍ په برخه کې مو خپل مسؤولیت ادا کړی وي.
د یادونې وړ ده، چې په دغه ستاینغونډه کې د کابل ښار د بېلابېلو برخو څخه نژدې ۲۷ ښځينه پولیسې په ستاینلیکونو وستایل شوې.
