د ۱۳۹۸ کال د زمري میاشت کې د ۱۳۴۴۸ کسانو ستونزو ته رسیدګي شوې ده

د افغانستان د اسلامي جمهوري دولت لویې څارنوالۍ، انساني کرامت ته په درناوي او د هېواد د نافذه قوانینو او د هېوادوالو د شرعي او بشري حقونو په رعایتولو سره په بې پرې او خپلواکه توګه د روان کال په زمري میاشت کې، د مرکز له ازادۍ  محروم ځایونه وڅېړل، چې په پایله کې یې د ۱۳ زره او ۴۴۸ محجوزو، مظنونو، تورنو او محبوسو کسانو ستونزو ته رسیدګي شوې ده.

له ازادۍ پر محرومو ځایونو د نظارت څارنوالۍ د عمومي ریاست د راپور پر بنسټ، د روان کال د زمري میاشت کې د کابل ولایت د مرکز له ۶۳ محبوسینو، د نارینه توقیف خونې له ۱۶۵ تورنو کسانو، د نارینه نظارت خونې له ۵۰ مظنونینو، د ښځینه توقیف خونې او محبس له ۷۰ تورنو او محبوسو او د کابل ولایت د ماشومانو د روزنې او اصلاح مرکز له ۲۵۱ محجوزینو سره په مستقیم ډول خبرې شوې او د قانوني ستونزو د حل په اړه یې لازم او قانوني ګامونه اوچت شوي دي.

د نارینه ازادۍ محرومو ځایونو کې د ترسره شوې څېړنې او نظارت په ترڅ کې ۳۳ محبوسین او ۷۰ نور بندیان، چې په شورشي قضیو کې له ټاکل شوې قانوني مودې څخه زیات بندیان و؛ ازاد او ۸ کسان د صعب العلاجه ناروغیو د تشخیص په موخه د صعب العلاجه ناروغیو د تثبیت ټاکل شوي کمېسیون ته ور وپېژندل شول.

له بلې خوا، د یو زر او ۳۰۰ بندیانو دوسیې بیا کتل شوې، چې له دې جملې څخه د ۶۰۰ دوسیو د محاکماتي بهیر د چټکۍ لپاره اړونده څارنوالیو ته خبر ورکړل شوی دی.

راپور کې راغلي چې، په نظارت خونه، توقیف خونه، د ښځینه ازادۍ محرومو ځایونو او د کابل ولایت ښځینه محبس کې له ۳۰ توقیفي کسانو او ۴۰ محبوسینو سره مخامخ خبرې شوې دي او د رسمي پاڼو له لارې اړونده بنسټونو ته د توقیف شوو کسانو د برخلیک ټاکلو او د دوی د قانوني ستونزو د حل په موخه لازم هدایتونه ورکړل شوي او پردې سربېره د ۶۵ ښځینه تورنو د دوسیو د برخلیک ټاکلو په اړه اړونده مراجعو ته هم خبر ورکړل شوی دی.

په راپور کې د وړاندې شوې شمېرې له مخې، د ماشومانو د روزنې او اصلاح مرکز په ازادو او بندو ځایونو کې د درېیو ښځینه محجوزینو په شمول ۲۵۵ محجوزین تر حجز لاندې دي. له دې جملې څخه شپږ کسان چې د حبس موده یې بشپړه کړې وه، د لویې څارنوالۍ له څېړنو وروسته له حجز څخه ازاد شول.

د یاد ریاست د نظارتي کمېټو د راپور او دوامداره نظارت پر بنسټ، د یاد مرکز له ازادۍ محرومو ځایونو خونې، چې بندیانو یې له غوماشو شکایت درلود؛ د عامې روغتیا وزارت په همکارۍ دواپاشي شوې دي.

د دې تر څنګ د څرخي پله زندان ساحه کې بندیانو ته د روغتیایي خدمتونو د وړاندې کولو په موخه، د پنځوس بستریز روغتون د بنسټ ډبره هم اېښودل شوې ده.

همدارنګه په یاد مرکز کې د نارینه او ښځینه محبوسینو لپاره د دیني او حیاتي زده کړو په برخه کې د پوهنې وزارت د تعلیمي نصاب پلي کول، ښځینه محبوسینو ته د قالین اوبدلو کارځای جوړول، د ماشومانو د روزنې او اصلاح مرکز کې د اړینو درملو، لابراتوار، غاښونو، غوږ، ستوني او عمومي داخلې  د برخو په لرلو سره د مجهز(OPD) کلینیک جوړول، په یاد مرکز کې کسبي زده کړو لکه: بوټ ګنډنې، خیاطۍ، نجارۍ او فلز کارۍ ته د زمینې برابرول، همداراز یاد مرکز ته د کتابتون پرانستل هغه څه دي، چې لویې څارنوالۍ په خپلو هڅو او د اړونده بنسټونو په همکارۍ سره ترسره کړي دي.