لویې څارنوالۍ د ۳۸ کسانو په مظنونیت سره د نشه یي توکو د قاچاق ۳۱ قضیې د څېړنې تر بشپړاوي وروسته محکمو ته استولې دي
له نشه یي توکو سره د مبارزې د ځانګړې څارنوالۍ عمومي ریاست، د ۱۳۹۸ کال د وږي میاشتې په دویمه اونۍ کې د ۳۸ کسانو په مظنونیت سره د نشه یي توکو ۳۱ قضیې پیدا کړې او څېړلې دي.
یاد ریاست دغه قضیې د څېړنو تر بشپړاوي، د دعوو د اتهام نامو له ترتیب او د جرمونو د اثبات لپاره د اسنادو، شواهدو او دلیلونو تر راوړنې وروسته؛ محکمو ته استولې، چې د ۳۱ کسانو په مظنونیت سره ۱۹ قضیې ابتدایي محکمې ته، درې قضیې له نشه یي توکو سره د مبارزې ځانګړې استیناف محکمې ته او نهه نورې د وروستیو پرېکړو په موخه د سترې محکمې د عامه امنیت دیوان ته استول شوې دي.
پر دې سربېره، له نشه یي توکو سره د مبارزې د ځانګړې څارنوالۍ عمومي ریاست په دې وروستیو ورځو کې، د نشه یي توکو د ۱۶ بېلابېلو قضیو د تشرېح، تول، او بېلګو اخېستلو له پروسې څخه هم نظارت کړی دی.
