په درېیو وروستیو کلونو کې د انسان تښتونې اړوند ۵۷۴ قضیې څېړل شوې دي
دا خبره د افغانستان د اسلامي جمهوري دولت د لویې څارنوالۍ ویاند جمشېد رسولي په یوه خبري ناسته کې د ۱۳۹۸ کال د وري پر ۱۷ د حکومت د رسنیو او اطلاعاتو په مرکز کې بیان کړه.
د لویې څارنوالۍ ویاند په دغه خبري کنفرانس کې وویل، چې لویه څارنوالي ټولې قضیې په جدیت، پرېکنده او قانوني توګه څېړي. د نوموړي په خبره، لویه څارنوالي او د افغانستان حکومت په ټولو قضیو په ځانګړې ډول د انسان تښتونو قضیو کې په جدیت او پرېکنده توګه چلن کوي. د ښاغلي رسولي په خبره، لویې څارنوالۍ په همدې موخه تېر کال له کشفي او امنیتي ادارو او د هېواد له پانګوالو سره ګډ کنفرانس جوړ کړ.
نوموړي په دغې خبري ناسته کې وویل: «د دغې کنفرانس د لاسته راوړنو پر اساس، چې تېر کال د لویې څارنوالۍ، امنیتي او کشفي ادارو او د هېواد د پانګوالو تر منځ جوړ شوی و، ولسمشر له افغانستان څخه د پانګې تښتونې د مخینوي په موخه یوه ځانګړې کمېټه "د خصوصي سکتور د ساتنې کمېټې" په نوم جوړه کړه.»
د ښاغلي رسولي په باور، د یادې شوې کمېټې د کار یوه برخه د انسان تښتونو قضیو څارنه او څېړنه ده او دغه کمېټه د کورني او بهرني امنیت پر وړاندې له جرمونو سره د مبارزې څارنوالۍ تر نظر لاندې کار کوي. د لویې څارنوالۍ د ویاند په خبره، د انسان تښتونو قضیو اړوند یو زر او ۳۳ کسان نیول شوي او محاکمه شوي دي.
نوموړي د خپلو خبرو په دوام سره زیاته کړه، د انسان تښتونو قضیو عاملین په تېره هغه قضیې چې عاملین یې په وژنو مرتکب شوي، د جمهوري ریاست د عفوې او بند مودې کمونې له فرمانونو څخه نه شي برخمن کېدلای. د نوموي په باور، دا مسله د ورته قضیو پر وړاندې د افغانستان اسلامي جمهوري حکومت د جديت او پرېکنده دريځ ښکارندویي کوي.
د ښاغلي رسولي په خبره، په ۱۳۹۵ کال کې د ۳۲۹ کسانو له خوا ۱۹۶ قضیې، په ۱۳۹۶ کال کې د ۲۱۰ کسانو له خوا ۱۴۰ قضیې او په ۱۳۹۷ کال کې د ۴۹۴ کسانو له خوا ۲۳۸ قضیې پېښې شوې دي.
د نوموړي د خبرو پر بنسټ، د یو زر او ۳۳ کسانو له جملې څخه ۳۷ کسان په اعدام، پنځه کسان په ۳۰ کالو، یو کس په ۲۸، دوه کسان په ۲۷، یو کس په ۲۲، ۶۱ کسان په ۲۰، ۲۱ کسان په ۱۹ او اووه کسان په ۱۸ کالو بند محکوم او مجازات شوي دي.
نوموړي همداراز زیاته کړه، چې اووه کسان نور په ۱۷ کالو، ۶۹ کسان په ۱۶، ۱۴۴ کسان په ۱۵، څلور کسان په ۱۴، ۱۴ کسان په ۱۳، ۹۸ کسان په ۱۲، درې کسان په ۱۱ کالو او ځينې نور یې له څلورو میاشتو تر لس کالو پر بند محکوم او مجازات شوي دي.
