په لویه څارنوالۍ کې د مسلکي بستونو ازموینه واخیستل شوه
دغه ازموینه د هېواد د لوی څارنوال څارنپوه محمد فرید حميدي، مرستیالانو او د دې ادارې د ځینو رئیسانو په حضور کې د ۱۳۹۷ کال د چنګاښ پر پنځمه د لویې څارنوالۍ د دارالامان په ودانۍ کې واخیستل شوه.
دغه مسلکي بستونو ته ۸۸۷ تنو نارینه او ښځینه وو نوملیکنه کړې وه، چې د لویې څارنوالۍ د واک او د تشکیل قانون له مخې یواځې ۴۴۴ کسان په شرایطو برابر و او له دې جملې څخه په یاده شوې پروسه کې شا او خوا ۴۰۰ کسانو په ازموینه کې ګډون کړی و.
د هېواد لوی څارنوال څارنپوه محمد فرید حمیدي د یادې شوې پروسې د روڼوالي په اړه ډاډ ورکړ او زیاته يې کړه چې هیڅ بریالی به نابریالی او همدارنګه هېڅ نابریالی به بریالی نشي. ښاغلي حمیدي زیاته کړه:«موږ په دغه پروسه کې د روڼوالي او عدالت ټینګښت ته ژمن یو.»
د هېواد لوی څارنوال څارنپوه محمد فرید حمیدي همداراز ټینګار وکړ چې لویه څارنوالي په هېواد کې عدالت پراختیا او ښې حکومتولۍ ته ژمنه ده. د ښاغلي حمیدي په خبره په دغه برخه کې د مسلکي، ژمنو، ځوانو او باظرفیته خلکو ګومارنه مهم رول لري.
په ورته مهال کې د لويې څارنوالۍ د مالي او اداري چارو مرستیال وحیدالدین ارغون هم د دغه آزموینې ګډونوالو ته د یادې شوې پروسې د روڼوالي په اړه ډاډ ورکړ او زیاته یې کړه:«د دغه ازموینې پوښتنې د ځانګړې کمېټې لخوا په پښتو او دري ژبو ترتیب شوي دي. د ازموینپاڼو د ارزونو کمېټه کې به د یادې شوې پروسې درې تنه ګډونوال د نورو ګډونوالو په نمایندګۍ سره د نمرو ورکولو څخه لیدنه کوي.»
نوموړي همدارنګه ټینګار وکړ چې یوه بله کمېټه هم د ازموینې د ګډونوالو د شکایت اورېدنې په موخه ټاکل شوی ده، چې د پایلو د اعلان وروسته به د دوی شکایتونو ته په ځیرکۍ او جدي توګه لاسرسی کوي.
د لویې څارنوالۍ د بشري سرچينو د پراختیا عمومي رئیس محمد ناصر همت د خبرو پر بنسټ، د ازموینپاڼوله کتنې وروسته به، له دغه ګډونوالو څخه ۷۰ تنه په ولایتنو او لس نور به په مرکز کې د څارنوالانو په توګه وګومارل شي.
له بلې خوا د یادې شوې ازموینې ګډونوالو د لویې څارنوالۍ د مسؤولانو څخه مننه وکړه او د دې تر څنګ یې په یاده شوې پروسه کې د ازموینې پر روڼوالي، کتنې او ښه چلند رضایت ښودلی دی.
د یادې شوې ازموینې یوې ګډونوالې مژګان بنی هاشم د دغه ازموینې پوښتنې مسلکي وبللې او د دې تر څنګ یې د ازموینې روڼوالی او د مسؤولینو چلن د قناعت وړ وباله.
