د لویې څارنوالۍ او د کابل ولایت د سویلي زون د کلیو وکیلانو تر منځ د همغږۍ ناسته وشوه
دغه ناسته د هېواد د لوی څارنوال څارنپوه محمد فرید حمیدي، د کابل د سویلي زون د استیناف څارنوالۍ رئيس عزیز احمد سرباز، د کابل ولایت د عسکري استیناف څارنوالۍ رئیس محمد نواب احمدزي، د ځینو څارنوالانو او د کابل ښار د اولې، دویمې، اوومې او اتمې ناحیې د کلیو د وکیلانو په ګډون د ۱۳۹۷ کال د سلواغې پر ۱۰ د لویې څارنوالۍ د دارالامان په ودانۍ کې وشوه.
د هېواد لوی څارنوال څارنپوه محمد فرید حمیدي په دغه ناسته کې وویل، چې د افغانستان دولتي ادارې تل د هېوادوالو د خدمت په موخه کار کوي. د نوموړي په باور، هېڅ اداره له خلکو سره له نژدې او مستقیمو اړیکو پرته خپلې دندې په ښه توګه پر مخ نشي بېولای.
د هېواد د لوی څارنوال په خبره، له خلکو او ادارو سره په اړیکو شته ستونزې حل کولای شو. د نوموړي په خبره، د هېواد لویه څارنوالي له بېلابېلو ادارو سره د همغږۍ ناستې کوي او دغې ناستو ته به دوام ورکوي.
ښاغلي حمیدي د کابل په سویلي زون کې د شته ستونزو تر اورېدو وروسته وویل: «د هېواد لویه څارنوالي د خلکو عزت، کرامت او حیثیت ته درناوی خپله بنسټیزه دنده ګڼي.» د نوموړي په خبره، لویه څارنوالي په خپلو کړنو کې عدالت او انصاف ته په پاملرنې، په غیر سیاسي، خپلواکه او بې پرې توګه تصمیم نیسي.
د هېواد لوی څارنوال د جرم او جنایت په له منځه وړلو کې د کلیو د وکیلانو رول مهم وباله او ویې ویل: «د لویې څارنوالۍ دروازه تل ستاسو پر مخ خلاصه ده او هر وخت کولای شئ، خپلې ستونزې له ما سره شریکې کړئ.»
ښاغلي حمیدي د فساد په له منځه وړلو کې د خلکو همکاري او رول مهم وباله او ټينګار یې وکړ، چې لویه څارنوالي اصلاحاتو ته ژمنه ده.
په ورته مهال کې، د کابل ولایت د عسکري استیناف څارنوالۍ رئیس محمد نواب احمدزي په دغه ناسته کې وویل، چې لویه څارنوالي پخپلو ټولو تشکیلاتو کې د قانون یوشان تطبیق ته ژمنه ده. د نوموړي په خبره، د کابل ولایت د استیناف څارنوالۍ ریاست د کابل د سویلي زون پولیسو زیاتې قضیې څېړلې او مظنونان یې د قانون منګولو ته سپارلي دي. د کابل ولایت د عسکري استیناف څارنوالۍ رئیس د خپلو خبرو په دوام سره وویل: «د پولیسو د سرغړونو په برخه کې یې د هېوادوالو د شکایت ثبتونې په موخه ۱۰۰ شمېره جوړه کړې، تر څو له دې لارې د خلکو ستونزې او شکایتونه واورېدل شي.»
دا درېیمه ناسته ده، چې د لویې څارنوالۍ او د کابل ښار د بېلابېلو برخو د کلیو له وکیلانو سره وشوه.
