په عسکري چارو کې د لویې څارنوالۍ مرستیالۍ په درېیو تېرو میاشتو کې ۱۲۱۰ قضیې څېړلې دي
په عسکري چارو کې د لویې څارنوالۍ مرستیالۍ د راپور پر بنسټ، د ۱۳۹۸ مالي کال په دوه یمه ربع کې، یادې مرستیالۍ یو زر او ۲۱۰ جنایي قضیې څېړلې دي.
د یاد راپور له مخې، ۶۰۸ قضیې د صورت دعوې او اتهام نامې له ترتیب وروسته ابتدایي محکمې ته استول شوې، چې د ۲۲۵ قضیو په اړه همدې محکمې او د ۸۳ نورو په اړه استیناف محکمې پرېکړه کړې ده.
په دغه راپور کې راغلي، چې ۱۳۹ قضیې بېلابېلو مراجعو ته استول شوې، ۵۱ د نېمګړیو دلیلونو له امله اړونده مراجعو ته مستردې او ۹۵ نورې د مناسبو دلائېلو له امله ساتل شوې دي.
په یاد راپور کې همداراز څرګنده شوې، چې ۶۵ قضیې د اشخاصو، ۱۵ نورې د کورني او بهرني امنیت پر ضد جرمونو او ۱۶ د دوکې، جعل او تزویر، رشوت او غلا په اړه دي.
په یاد شوي راپور کې د قضیو د راغلي تعداد له مخې، د نغدي جريمې، اختلاس، نشه یي توکو او د ځینو نظامي کارکوونکو د معاش پنځوس سلنه چې په نغدي جریمه محکوم شوي، پنځه میلیونه او۸۳۱ زره او ۳۹ افغانۍ په لاس راغلې او د دولت په پرېکنده حساب مرکزي بانک ته استول شوي دي
