د لویې څارنوالۍ د عسکري برخې د ۹۶مسلکي بستونو ازموینه واخېستل شوه
یادو شمېر بستونو ته د ښځو په ګډون شاو خوا درې زره کسانو غوښتنلیکونه سپارلې و، چې له دې جملې څخه ۵۵۷ کسان په شرایطو برابر او ویې کولای شو، چې په دغې ازموینه کې سیالي وکړي.
دا ازموینه د لوی څارنوال د مالي او اداري چارو مرستیال وحیدالدین ارغون، د بشري سرچینو د پراختیا عمومي رئیس محمد ناصر همت، د کورني او بهرني امنیت څارنوالۍ رئیس شمس الله احمدزي، د کنترول او مراقبت عمومي رئیس محمد نواب احمدزي، عسکري چارو کې له اداري فساد سره د مبارزې څارنوالۍ رئیس عبدالقیوم نظامي، د مسلکي زده کړو رئیس عزیز الله فصیحي او د یادې ادارې د ځینو نورو رئیسانو په حضور کې، د ۱۳۹۸ کال د چنګاښ پر ۱۳ واخېستل شوه.
د لوی څارنوال د مالي او اداري چارو مرستیال په دغه پروګرام کې وویل، چې د افغانستان د اسلامي جمهوري دولت لویه څارنوالي، د اساسي قانون د ۱۳۴ مادې پر بنسټ په محکمو کې د جرمونو د څېړنې او د دعوې د اقامې واک لري. نوموړي زیاته کړه: «همدې ټکو ته په پاملرنې سره لویې څارنوالۍ تل هڅه کړې، چې د ازادې سیالۍ له لارې تجربه لرونکي، ژمن او وړ کسان په دندو وګماري.»
ښاغلي ارغون زیاته کړه، پروسږ کال هم لویې څارنوالۍ په درېیو ازموینو کې وکړای شو، د ازادې سیالۍ له لارې د مرکز او ۳۴ ولایتونو د استیناف څارنوالیو او نظامي کدر پرسونل په اداري او مسلکي برخو کې وړ کسان په امتیازي معاشاتو سره په دندو وګماري.
ښاغلي ارغون د ورته ازموینو د اخېستو موخه، د قانون د تطبیق په برخه کې د عدلي خدمتونو د بهیر ښه والی او د ژمنو، وړ او ظرفیت لرونکو کسانو پېژندنه وبلله او ویې ویل، تر هغه چې په دغې اداره کې د حقوقي پوهې کچه لوړه نه کړو؛ نه به عدالت تأمین شي او نه به قانون پلی کړای شو. نوموړي د ازموینې د شفاف بهیر او د نمرو د ورکړې په اړه وویل، د یادې پروسې د شارټلېسټ، د پوښتنو د ترتیب او برابرونې لپاره کمېټې ټاکل شوې وې او د شکایتونو د اورېدو لپاره به هم د پایلو تر اعلان وروسته کمېټه ټاکل کېږي.
ښاغلي ارغون د ازموینې له ګډونوالو وغوښتل، چې د ازمویني په پای کې پخپلو کې درې کسان د استازو په توګه د پارچو د کتنې بهیر د نظارت لپاره د ازموینې کمېټې ته وروپېژني.
د بشري سرچینو د پراختیا عمومي رئیس محمد ناصر همت په دغه پروګرام کې وویل، چې دا کسان په اړونده برخو کې د تقاعد شویو څارنوالانو پر ځای او د ۱۳۹۸ کال د تشکیل په زیات شویو بستونو کې د ازادې سیالۍ له لارې په شفاف ډول ګمارل کېږي. نوموړې د خپلو خبرو په دوام سره ګډونوالو ته وویل: «تاسو به د قانون د تطبیق او عدالت د تأمین په برخه کې لوی رسالت په غاړه ولرئ.»
دا په داسې حال کې ده، چې لویې څارنوالي د څو کلونو راپدې خوا د وړ او استعداد لرونکو کسانو د ګمارنې په موخه، خپل بستونه ازادې سیالۍ ته ورکوي.
