د لویې څارنوالۍ د ملکي کارکوونکو د اطلاعاتو د ثبت او بایومتریک بهیر پیل شو

د اداري اصلاحاتو او ملکي خدمتونو خپلواک کمېسیون د بشري سرچینو مدیریت د اطلاعاتو سیسټم(HRMIS) کې د ۱۳۹۸ کال د مرغومي پر لسمه، د لویې څارنوالۍ د ملکي کارکوونکو د اطلاعاتو د ثبت او بایومتریک بهیر پیل شو.

په دغه پروګرام کې چې د لویې څارنوالي د مالي او اداري چارو مرستیالۍ د ناستو تالار کې جوړ شوی و، د لوېې څارنوالۍ د مالي او اداري چارو مرستیال وحیدالدین ارغون، د ملکي خدمتونو ادارې عمومي رئیس احمد مسعود توخي، د اداري اصلاحاتو او ملکي خدمتونو خپلواک کمېسیون د بشري سرچینو مدیریت د معلوماتو رئیس زرغونې اسلمي او د لویې څارنوالۍ ځینو رئیسانو ګډون کړی و.

په مالي او اداري چارو کې د لوی څارنوال مرستیال وحیدالدین ارغون په دغه پروګرام کې د بشري سرچینو مدیریت د معلوماتو سیسټم پر پلي کېدو ټینګار وکړ او ویې ویل: «د یاد سیسټم پر پلي کولو سره کولای شو د هېواد په کچه د ملکي خدمتونو د کارکوونکو د ارقامو په تړاو معلومات ترلاسه او همداراز د یاد سیسټم پر پلي کولو سره الکترونیکي حکومتولي هم پیاوړتیا مومي.»

ښاغلي ارغون د خپلو خبرو په دوام سره زیاته کړه، لویه څارنوالۍ کې د بایومتریک لړۍ لومړی له اداري برخو پیلږي او وروسته به مسلکي برخې هم راونغاړي. نوموړي د ښې ځواب وېینې لپاره د یاد سيسټم تطبیق مهم وباله او په خبره یې، د دې سیسټم پر تطبیق سره به د خیالي کارکوونکو د موجویت ادعاوې مشخصې شي او ترڅنګ به یې د دولتي ادارو د پالیسۍ جوړونې لپاره د معلوماتو ښه سرچینه ولرو.

له بلې خوا د ملکي خدمتونو ادارې عمومي رئیس احمد مسعود توخي په دغه پروګرام کې وویل، لویه څارنوالي د اداري اصلاحاتو په برخه کې د نورو ادارو په پرتله مخکښه او د کارکړلو ښه زمینه یې برابره کړې ده. د ښاغلي توخي په خبره، لویه څارنوالي د معلولینو د ګمارنې په برخه کې هم د دولتي ادارو په منځ کې یوه بېلګه ده.

ښاغلي توخي زیاته کړه: «د افغانستان اسلامي جمهوري دولت رهبري، د بشري سرچینو مدیریت د معلوماتو سیسټم(HRMIS) کلک ملاتړ کوي او موږ هم په دولتي ادارو کې د ستونزو حل ته ژمن یو.» د نوموړي په خبره، دا سیسټم په ټولو دولتي ادارو کې پلی کېږي او د پالیسي جوړونې او د ملکي خدمتونو د کارکوونکو د هراړخیزه  او کره معلوماتو لپاره به یوه واحده مرجع وي. د هغه په خبره، دا سیسټم د دولت او د هېوادوالو ملکیت دی او تر ډېره هڅه شوې څو د خوندیتوب لپاره یې له سټنډرډ معیارونو کار واخېستل شي.

د پروګرام په پای کې د بایومتریک او د اطلاعاتو د ثبت رسمي بهیر د مالي او اداري چارو مرستیال، رئیسانو او د لویې څارنوالۍ د ځينو نور کارکوونکو په حضور پرانستل شو. تمه ده، څو ورځو کې د یادې ادارې ټول اداري کارکوونکي دغه سیسټم ته شامل شي.