په عامه او خصوصي ادارو کې له ښځو سره د تاوتریخوالي د مبارزې څارنوالۍ عمومي ریاست او د مېرمنو لپاره د عدالت مؤسسې ترمنځ د همکارۍ هوکړه لیک امضا شو

په عامه او خصوصي ادارو کې له ښځو سره د تاوتریخوالي د مبارزې څارنوالۍ عمومي ریاست او د مېرمنو لپاره د عدالت مؤسسې ترمنځ د همکارۍ هوکړه لیک امضا شو

د لویې څارنوالۍ په عامه او خصوصي ادارو کې له ښځو سره د تاوتریخوالي د مبارزې څارنوالۍ عمومي ریاست او د مېرمنو لپاره د عدالت مؤسسې ترمنځ د همکارۍ هوکړه لیک د ۱۳۹۹ کال د لړم پر پنځمه د تخنیکي همکارۍ په موخه لاسلیک شو.

د دې هوکړه لیک پر اساس، د مېرمنو لپاره د عدالت مؤسسه به د ځورونې د متضررینو بشري حقونو د نقض په اړه د حقیقت پلټنې او سیستماتیک تحقیق په برخه کې له څارنوالانو سره همکاري کوي. له خصوصي او دولتي شپږو پوهنتونو څخه د ځورونې په اړه د یادې شوې مؤسسې د معلوماتو شریکول، د تخنیکي همکارۍ په اړه مرسته، څارنوالانو ته له متضررینو سره د مرکې په برخه کې د روزنیزو پروګرامونو ترسراوی، له متضررینو سره وړیا حقوقي مساعدت، د عامه پوهاوي لپاره د کمپاین ترسراوی او د بنرونو او بلبوردونو چاپ او ځینې نور موارد به د مېرمنو لپاره د عدالت مؤسسې مسؤولیت وي.

په دې هوکړه لیک کې راغلي، چې په عامه او خصوصي ادارو کې له ښځو سره د تاوتریخوالي د مبارزې څارنوالۍ عمومي ریاست به د اړتیا پر مهال قضیو ته د رسیدګي په صورت کې د یادې مؤسسې همکاري غواړي او همداراز به د څارنوالۍ په محوطه کې د مېرمنو لپاره د عدالت مؤسسې وکیلانو سره همکاري کوي. دا عمومي ریاست به د روزنیزو موادو، د پوسټرونو، بنرونو او بلبوردونو موادو او همداراز د پالیسي د تغییر او تحلیل په موخه په عامه او خصوصي ادارو کې د ځورونې قضیو کلنی شمېر له یادې شوې مؤسسې سره شریکوي.

په خصوصي او عامه ادارو کې له ښځو سره د تاوتریخوالي د مبارزې څارنوالۍ عمومي رئیسې څارنیار پروین رحیمي د دغه هوکړه لیک د امضا په مراسمو کې وویل، چې دا هوکړه د متضررینو قضیو ته ښه رسیدګي او له ښځو سره د تاوتریخوالي د مخنیوي قانون په برخه کې عامه پوهاوی زیات کړي.

د اغلې رحیمي په وینا، د دغه هوکړه لیک پر اساس به یاده مؤسسه په عامه او خصوصي ادارو کې د ځورونې متضررینو ته حقوقي مساعد برابروي او متضررینو ته به لازمې مشورې ورکوي. د نوموړې په وینا، دا ریاست ژمنتیا لري، چې د هوکړه لیک ټول مواد به عملي کوي.

له بلې خوا مېرمنو ته د عدالت مؤسسې رئيسه حمیرا رسولي وايي، چې دا مؤسسه به په خصوصي او عامه ادارو کې د ځورونې متضررینو ته حقوقي مساعد برابروي او همداراز به تخینکی همکاري هم کوي. د اغلې رسولي په وینا، په ټوله کې د دغې مؤسسې موخه د کاري چاپیریال خوندیتوب او متضررینو ته د عدالت تأمین دی.