د څرخي پله د توقیف خونې د محبوسینو ستونزې له نژدې بررسي او له هغوی سره لیدنه وشوه
د لویې څارنوالۍ پلاوي د قضايي تعقیب چارو د مرستیال ډاکټر غلام حیدر علامه په مشرۍ، د ۱۴۰۰ لمریز کال د چنګاښ پر اوومه د زندانونو د چارو تنظیم ادارې په همغږۍ د کابل د توقیف خونو ریاست لیدنه وکړه. له دغه پلاوي سره د احکامو پر تنفیذ د نظارت څارنوالۍ او د کابل د زونونو د څارنوالیو رئيسانو او د تحقیق او تنقیذ پر احکامو د نظارت څارنوالانو هم ملتیا کوله.
د دې لیدنه موخه د کابل په توقیف خونه کې د محبوسینو، محجوزینو او مظنونینو ستونزو ته رسېدنه بلل شوې ده.
دا لیدنه د زندانونو چارو د تنظیم ادارې په همغږۍ، د لويې څارنوالۍ د هدایت پر اساس د هغو بندیانو د ستونزو د هواري په موخه شوې، چې په زندانونو کې بې برخلیکه پاتې دي.
د لويې څارنوالۍ د قضايي تعقیب چارو مرستیال د کابل د توقیف خونې د محبوسینو نسبتي دوسيې، سوابق او اسناد د زندانونو د چارو تنظیم ادارې د رااستول شوي نوملړ له مخې وارزول، چې په پایله کې مشخصه شوه، د ۶۹۰ توقیف شویو افرادو د نسبتي دوسیو طی مراحل هغوی ته ابلاغ شوي نه دي.
د لویې څارنوالۍ پلاوي له بندیانو سره تر خبرو اترو وروسته دا دنده پر غاړه واخیستله، چې ډېر ژر به د دوی د دوسیو د طی مراحل پایله د زندانونو د چارو تنظیم ادارې ته واستوي.
ښاغلي علامه له بندیانو سره په جداګانه لیدنه کې په مرکز او ولایتونو کې د بندیانو د ستونزو په ځانګړې توګه د بې برخلیکه بندیانو ستونزو د هواري لپاره د کمېټې په تړاو وویل، چې د دوی ستونزو او دوسیو ته به ژر تر ژره رسیدګي وشي.
د کابل په توقیف خونه کې د بې برخلیکه بندیانو د ستونزو هواري به هکله پرېکړه وشوه، چې د بندیانو د نسبتي دوسیو د رسیدګۍ په موخه دې اووه کمېټې جوړې او هره کمېټه دې د دغو محبوسینو د دوسیو د خلاوو او ستونزو په اړه خپل راپور اریه کړي، چې په تړاو يې قانوني پرېکړه وشي او دوسيې يې طی مراحل شي.
دا په داسې حال کې ده، چې د لويې څارنوالۍ سرپرست مرکزي او استیناف څارنوالیو ته هدایت ورکړی، چې د زندانونو چارو د تنظیم ادارې په همغږۍ د بندیانو ستونزو د هواري په هکله په یوې اوونۍ کې لازم اقدامات ترسره او د اجرااتو په تړاو دې اطمینان ورکړل شي.
د لویې څارنوالۍ مشرتابه دا خپله دنده ګڼي، چې د بشري حقونو او د هېواد د اتباعو د حقوقو د تأمین لپاره د زندانو چارو د تنظیم ادارې سره دوامداره همکاري ولري.
